Паводле ацэнкі Міжнароднага агенцтва па вывучэнні раку (IARC, структура СААЗ), тры з чатырох будучых выпадкаў раку страўніка можна перадухіліць, калі выяўляць і лячыць распаўсюджаную бактэрыяльную інфекцыю — Helicobacter pylori (H. pylori). Гэта галоўны і пры гэтым ліквідавальны фактар рызыкі развіцця гастрыту і злаякасных пухлін страўніка, піша New Atlas.
Паводле новага даследавання, апублікаванага ў часопісе Nature Medicine, пры захаванні цяперашніх стратэгій лячэння больш чым 15 мільёнаў чалавек, якія нарадзіліся паміж 2008 і 2017 гадамі, захварэюць на рак страўніка цягам жыцця. Каля 76% гэтых выпадкаў — то-бок больш за 11 мільёнаў — будуць выкліканыя інфекцыяй H. pylori, і, тэарэтычна, іх можна перадухіліць.
Больш за ўсё новых выпадкаў чакаецца ў Азіі — каля 10,6 мільёна, потым у Амерыцы (2 мільёны) і Афрыцы (1,7 мільёна). Моладзь да 50 гадоў падлягае асаблівай рызыцы: захворвальнасць ў гэтай групе імкліва расце, нягледзячы на тое, што гэта можна перадухіліць.
H. pylori — бактэрыя, якая выклікае хранічнае запаленне слізістай страўніка. Пры гэтым інфекцыя добра паддаецца лячэнню: для яе ліквідацыі выкарыстоўваюць камбінацыю антыбіётыкаў і прэпаратаў, якія зніжаюць кіслотнасць (інгібітары пратоннай помпы).
Даследчыкі падкрэсліваюць, што масавыя праграмы скрынінгу і лячэння H. pylori могуць быць эфектыўныя і эканамічна апраўданыя нават у краінах з нізкім узроўнем даходу. Паводле іх, такія праграмы коштам і эфектам супастаўныя з вакцынацыяй ад ВПЧ або гепатыту B.
Нават калі ахоп складзе не 100%, а 80−90%, удасца перадухіліць да 68% выпадкаў раку страўніка. Навукоўцы заклікаюць засяродзіцца на распрацоўцы вакцыны супраць H. pylori і запуску праграм «правер і лячы» ў розных краінах — ад высокаразвітых да тых, якія развіваюцца.