У сераду, 9 ліпеня, некаторыя кліенты трох найбуйнейшых банкаў краіны сутыкнуліся з праблемай, праз якую не маглі ажыццяўляць аперацыі на картках. У часткі карыстальнікаў рахункі сышлі ў мінус. На рашэнне праблемы пайшоў увесь дзень. Крыніца «Люстэрка» ў банкаўскай сферы патлумачыла, чаму збой прывёў да «спісвання» сродкаў.
Кліентка «Беларусбанка» западозрыла, што «зніклі грошы ў тых, хто, відаць, у гэты перыяд часу разлічваўся ў крамах ці здзяйсняў нейкія аперацыі». Паводле яе, у дачок, якія 9 ліпеня не карысталіся карткамі, нічога не спісалі, а ў іншых знаёмых, якія нешта куплялі ў дзень збою, спісванні былі.
Аднак у каментарах з ёю не пагадзіліся — многія расказалі, што былі ў той дзень на працы і грошы не выдаткоўвалі, але на картках усё роўна быў мінус.
Адна з імаверных прычын таго, што ў людзей «спісаліся» грошы, паводле інфармацыі крыніцы «Люстэрка» ў банкаўскай сферы, знаёмай з сітуацыяй, — падчас тэхнічнага збою старыя аперацыі правяліся як новыя. То-бок збой прывёў да таго, што кліенты 9 ліпеня нібыта зноў здзейснілі пакупкі ці пераводы, якія рабілі за нейкі перыяд да гэтага. Гэта магло адбыцца падчас абнаўлення сістэм, калі здарыўся збой, альбо, як варыянт, было звязана з чалавечым фактарам, напрыклад, памылкай супрацоўніка або супрацоўнікаў падчас уводу звестак ці наладжвання працэсаў.
Нагадаем, намеснік старшыні Нацбанка Андрэй Картун напярэдадні прызнаў, што збой «быў звязаны з чарговым планавым абнаўленнем сістэмы і закрануў пэўныя банкі». Аднак афіцыйна ніхто з прадстаўнікоў улады не патлумачыў, чаму збой прывёў менавіта да такога выніку і як збіраюцца дзейнічаць, каб гэтага не паўтарылася.
«Грошы нікуды не зніклі. Ніхто іх не спісваў. Гэта не была вірусная атака ці ўзлом, а пэўны тэхнічны збой падчас чарговага абнаўлення сістэмы. Маглі пацярпець усе, у тым ліку супрацоўнікі Нацыянальнага банка, Беларускага міжбанкаўскага разліковага цэнтра і звычайныя грамадзяне», — запэўніў тады прадстаўнік рэгулятара.
Нагадаем, раніцай 9 ліпеня кліенты некалькіх банкаў заўважылі, што з іх банкаўскіх картак былі спісаныя грошы. Супрацоўнікі кол-цэнтра «Беларусбанка» пацвердзілі, што сапраўды ўзнікла праблема, і запэўнілі, што яна будзе вырашаная цягам дня.
«У сувязі з тэхнічным збоем, які адбыўся ў апаратна-праграмным комплексе 9 ліпеня, могуць мець месца адмоўныя балансы картак ААТ „ААБ Беларусбанк“, ААТ „Белаграпрамбанк“ і ААТ „Белінвестбанк“», — паведамілі ў БПЦ, паабяцаўшы ліквідаваць усе праблемы да 14.00 9 ліпеня.
Аднак у гэты тэрмін укласціся не ўдалося, і дэдлайн некалькі разоў пераносілі. У выніку збой ліквідавалі ў ноч на 10 ліпеня.
Чытайце таксама
