На месцы былой прамзоны завода «Агат» у Мінску хутка з’явіцца новы жылы квартал. Цяпер рабочыя расчышчаюць тэрыторыю ў раёне вуліц Валгаградскай, Кядышкі і праспекта Незалежнасці, піша тэлеграм-канал «Минскстрой».
Пад знос пайшлі 38 старых будынкаў 1950-х гадоў — частка з іх ужо дэмантаваная, працы працягваюцца.
Разбіраюць усё з дапамогай цяжкай тэхнікі — экскаватары бураць сцены і падмуркі. Самай цяжкай задачай стаў дэмантаж дзвюх высокіх труб былой кацельні, амаль 50 метраў вышынёй. Каб іх бяспечна знесці, выкарыстоўваюць прамысловых альпіністаў, якія ўручную разбіраюць канструкцыі да 27 метраў, а потым падключаецца тэхніка.
Адначасова прыбіраюць старыя інжынерныя сеткі. Будаўнічае смецце сартуюць і вывозяць — кожны дзень на пляцоўцы працуе да 40 самазвалаў.
Пасля завяршэння падрыхтоўчых работ на гэтай тэрыторыі пачнецца будаўніцтва новага жылога квартала.